दार्चुलाको उत्तरी भेग, दुहुँ ब्याँस गाउँ । गाउँकाे फेदबाट महाकाली नदी बगेको छ ।
यहीँ महाकाली नदीले नेपाल र भारतलाई जोडेको छ ।
अनि मान्छे जोड्नलाई चाहिँ तुइन बनेको छ ।
यहाँका स्थानीयहरु नुन तेल गर्न तुइनबाटै भारत जान्छन् । मजदुरी गर्न पारि जानेहरुको बाटो पनि यहीँ नै हो ।
तुइनलाई स्थानीय भाषामा ‘घाट’ भन्दछन् ।
महिलाहरु घिर्नी जाेडेकाे टिनकाे बाकसबाट पारी तर्छन् ।
पुरुषहरु चाहीँ कम्मरमा डाेरी बाधेर तर्ने गर्छन् ।
यसरी एउटा डोरीको भरमा नदी वारपार गर्दा थुप्रैको ज्यान गइसक्यो ।
दुहुँ गाउँमा तुइनबाट आफन्त गुमाएका एक्ला अनुहारहरु धेरै भेटिन्छन् ।
