गाईको छेउमा मुरली बजाइरहेका उनी कृष्ण होइनन् कुसुम हुन् । कुसुम भण्डारी । लोक गीतका पारखीहरुले कहिँ कतै सुनेको नाम हुनुपर्छ ।
मुरली गाइ फार्ममा उनले हामीलाई मुरली चिया खुवाए । विश्वकर्मा पुजाको दिन हामी पुग्दा रातो टिका लगाइदिइसकेका थिए ।
स्याङ्जा वालिङ नजिकैको गेझा गाउँमा रहेको मुरली गाइ फारममा कुसुमका अरू ३ बालसखाहरु जोडिएका छन् । विष्णु, तारा र प्रेम ।
घाँस काट्न जाने बेला भएको छ । जाँगर चलाउन उनीहरुले हार्मोनियमको तालमा एकछिन गीत रन्काए ।
हार्मोनियमका धुनहरुले शरिरमा उर्जा भरेर टोली अब घाँस काट्न हिँड्यो ।
सफा सेतो सर्ट लगाएका डि आर भण्डारी बाँसुरी बोकेर पछिपछि लागे । उनी पेशाले शिक्षक हुन् । गाई फारममा साथीभाइसँग सांगितिक माहोल बनाउन बेला बेला आइरहन्छन् ।
बारीमा लगाएका दुधिला घाँसहरु काटुन्जेल बाँसुरी बजिरह्यो । घाँस काट्ने खुर्केर आयो जोवन हुर्केर ।
उसो त जोवन हुर्किएकाहरु आजकल गाउँघरमा कहाँ भेटिन्छन् र? शहर र परदेशले बोलाइहाल्छ ।
कुसुम र साथीहरुले सपना देखेका छन् । गाउँ छोडेर पलायन नहुने सपना । यी सपनाका सेरोफेरो नै उनीहरुले बाँच्न खोजिरहेको कथा हो ।
उसो त कुसुमका जिन्दगीका केही कथाहरु बितिसकेका छन् ।
कुसुमलाई सानैदेखि लोक गीत संगीतमा असाध्यै रुचि थियो ।
मुखियाका छोरा पढ्न भनी बुटवल झरेका थिए । लुकी लुकी संगीत सिक्न जान्थे ।
बुटवल पछि उनी साङ्गितिक सपना देखेर काठमाडौं छिरे । संगीतलाई कर्म बनाए । एरेन्जर बनेर काम गर्न थाले । एकाध गीत हिट पनि भए ।
काठमाडौं बस्दा उनलाई सँधै गाउँघर र पाखा पखेराको सम्झना आइरहन्थ्यो ।
एकदिन उनले गाउँ फर्किने निधो गरे ।
सारा मान्छेले सपना देख्ने शहरबाट भर्खर उँभो लाग्न लागेको साँगितिक कर्मलाई चटक्कै छाडेर उनी गाउँ फर्किए ।
घरका आमा बुबा मात्र होइन साथी भाइ पनि छक्क परे ।
मन मिल्ने साथीहरुसँग मिलेर कृषी कर्म सुरु गरे । यो गाइ फारम त्यसैको निरन्तरता हो ।
लोक गीत संगीतमा डुबिसकेका थिए कुसुम । गाउँमा व्यवसायसँगै उनले रहरको काम पनि सुरु गरे । साथीहरुसँग मिलेर भजन टोली बनेको छ ।
गाउँका उत्सवहरुमा गाउने बजाउने । नयाँ पुस्तालाई पनि सिकाउने ।
दूधका क्यान बोकेर टोली गाउँतिर उकालो लाग्यो । आज कुसुमको घरमा साङ्गितिक साँझ हुने भएको थियो । बाटोमा भेटिनेहरुले निम्तो पाए ।
साँझ आधाउधी गाउँ मुखियाको आँगनमा भेला भयो । आँगनमा तयारी हुँदै थियो । कुसुम ९२ वर्षका बुबालाई सुताउन गए ।
भजन किर्तनबाट सुरु भएको माहोल रोइला र चुट्कासम्म पुग्यो ।