यो उदयपुरको उत्तरी भेगमा पर्ने बगुवा गाउँ हो । माझी बस्ती । गाउँ तल कोसी बगेको छ । कोसीपारि भोजपुर जिल्ला ।
नदी छेउका भिराला पाखाहरु सुरिला बाँसघारीले ढाकेका छन् । फविन्द्र माझी र दुई भाइ धमाधम बाँस काटेर पाखाबाट कोसी छेउमा सुल्क्याउँदै थिए ।
भोलि हामी बाँसको चेफामा उनीहरुसँगै नदीमा बग्ने सोचमा थियौं । गाउँलेहरुसँग नदीमा हेलिँदाका डरलाग्दा अनुभवहरु थिए ।
माझी गाउँमा हामीले भोलिको पर्खाइमा रात बितायौं ।
बिहानै हामी कोसी बगर पुग्यौं । खोलाबाट उठेका कुहिरोहरु बिस्तारै डाँडामाथि उक्लँदै थिए । नदी शान्त थियो ।
यो पन्चकोसी हो । सप्तकोशीका पाँच नदीहरु यहिँ मिसिएका छन् । अरुण र तमोर भरे बाटोमा भेटिन्छन् ।
सन्तोष माझी आज बगाइ लाने चेफालाई चोयाले कसकास पारेर अन्तिम रुप दिँदै थिए ।
माथि गाउँमा चाहिँ चेफा ठेल्नेहरु घरबाट निस्कने तयारी गर्दै थिए । दिनेशकी आमाले बाटोमा खाने जाँड छानिदिइन् ।
हामी गाउँलेसँगै नदीतिर झर्यौं ।