‘एउटा स्कूलको कथा’ अँग्रेजी सबटाइटलसहित

धेरै दर्शक र श्रोताले ‘हेर्ने कथा’ का अंकहरु अंग्रेजीमा पनि राख्नुपर्यो भनेर सुझाव दिनुभएको थियो । तपाईहरुको त्यही सुझावलाई ध्यानमा राखेर हामीले ‘हेर्ने कथा’का अंकहरुमा अंग्रेजी सबटाइटल राख्न सुरु गरेका छौ । यसपालि ‘हेर्ने कथा’को पहिलो अंक ‘एउटा स्कूलको कथा‘को अंग्रेजी सबटाइटल गरेका छौ ।

आशा छ हामीले गरेको यो प्रयासले कार्यक्रम धेरै भन्दा धेरै दर्शकसम्म पुग्रेछ । नेपाल र नेपालीको जीवन भोगाई र यहाँको समाज बारे चासो राख्ने र बुझ्न चाहने तर नेपाली भाषा नबुझ्नेहरुकालागि अंग्रेजी सबटाइटल गरिएका यी अंकहरु सहयोगी बन्नेछन् भन्ने हामीले अपेक्षा गरेका छौ ।

कपिलवस्तुको मायादेवी नगरपालिका-२, भै‌सकुण्डाको मुस्लिम केटीहरु मात्र पढ्ने मदरसामा एकदिन बिताएर तयार पारिएको कथा हो ‘एउटा स्कूलको कथा’ । उम्मे उम्मार कन्या क्याम्पसभित्र अरु कोही संचारकर्मीले प्रवेश पाएका थिएनन् । हामीले त्यो दुर्लभ मौका पाएका थियौं । यस विद्यालयकी छात्र शायजाँ नर्गिसलाई सम्झिनुहुन्छ ? उनले गाएको गीत धेरैले मनपराउनुभएको छ । उनलाई सुन्न छुटाउनुभएको भए अथवा फेरि सुन्न चाहनुहुन्छ भने यो लिंकमा उनले गाएका अरु गीतहरु पनि सुन्न सकिन्छ है ।

 

घरको कथा पनि

यसअघि हामीले ‘हेर्ने कथा’कै तेस्रो अंक ‘घरको कथा‘ पनि अंग्रेजी सबटाइटल गरिसकेका छौ । ‘घरको कथा’ झन्डै १ दशकपछि आफू बसेको पुरानो घर आँगनमा फर्किएर पुराना दिनको सम्झना खोजिरहेका भुटानी शरणार्थीहरुको भोगाईको कथा हो । यसमा अहिले क्यानडामा बसोबास गर्ने भुटानी शरणार्थीको एउटा परिवारको अनुभव समेटिएको छ ।

तपाईले हेर्न पाउनु भएको छैन भने यो कार्यक्रम पनि हेर्नेुस् है । अनि नेपाली भाषा नबुझ्ने आफ्ना साथीभाई आफन्तसँग यो लिंक शेयर गर्न नबिर्सनुस् ल । कस्तो लाग्यो प्रतिक्रिया चाहिँ हामीलाई दिनुहोला ।

आगामी दिनमा थप कथाहरुको अंग्रेजी सबटाइटल राख्दै जानेछौ । तपाईका यस्तै महत्वपूर्ण सुझाव र सल्लाहको हामीलाई सधै खाँचो पर्छ । हामीलाई यसैगरि सुझाव दिदै जानुहोला ।

अनि तपाईको जीवन भोगाईका कथाहरु पनि पठाउदै गर्नुहोला ।

 

भोलि नयाँ अंक

तपाईंको सम्झनाको लागि भोलि शुक्रबार जुन १५ तारिख बेलुकी ९ बजे हेर्ने कथामा नयाँ कथा ‘जुबेदा खातूनको कथा’ आउँदैछ । यो कथाको ट्रेलर हेर्नु भएको छैन भने यहाँ हेर्न सकिन्छ ।