तरेली परेका पहाडहरु – परेलीमा त सुन्दर देखिन्छन् । पहाडिया जिन्दगी बाँच्न भने उत्ति सजिलो छैन ।
नुन तेल किन्न र बिरामी हुँदा उपचार गर्न कठीन यात्रा गर्नु पहाडका सूदूर गाउँहरुका नमिठा नियती हुन् ।
भिमकाय पहाडका फेदीमा बग्ने नदीसँग कहिले भेटिँदै कहिले छुट्टिँदै कर्णाली राजमार्ग जसोतसो जुम्ला पुगेको छ ।
पहाड चिथोरेर कर्णाली मात्र बग्दैन, बाटो पनि बग्छ । पहाडका दुःख छल्न मुग्लान झर्ने मान्छेहरु बाटोसँगै बग्छन् । बाटोले पहाडका मान्छे बगाएको छ ।
कालीकोटका डरलाग्दा भीरहरु छिचोलिसकेपछि जुम्लाका फाँटहरु चम्किन थाल्छन् । पहराहरुमा हाम्फाल्दै हिँड्ने तिला नदी मैदानमा फाँट जस्तै बनिदिन्छिन् ।
जुम्ला पुगेपछि हाम्रो कथा बल्ल सुरु हुन्छ । यो जुम्लाबाट डोल्पा जाने बाटोको कथा हो ।