बागलुङकी नितु खड्का पेशाले स्टाफ नर्स हुन् । काेराेना संक्रमण भए यता नितुलाई फुर्सद छैन । नितु आफ्नो घरबाट सबेरै निस्किन्छिन् र पुग्छिन् काेराेना संक्रमितहरुका घर । अनि संक्रमितको निःशुल्क उपचार गर्छिन् ।कोराेना संक्रमण भएर घरमै आइसाेलेसनमा बसेकाहरुको गाह्रो साह्रो साेध्नु,अक्सिजन, ब्लडप्रेसर नाप्नु, कसैलाई ओखती दिनु उनकाे दैनिकी बनेकाे छ । कसैका लागि त उनको बाेली नै ओखती । नितु संक्रमितहरुको आत्मबल बढाउन सघाउँछिन् ।
उनले बागलुङ बजार वरपरका बिरामीका घर आँगन नपुगेकाे ठाउँ छैन ।
दिनदिनै संक्रमितको संख्या बढिरहेकाे छ । अस्पताल भरिभराउ छ । यस्तो बेलामा संक्रमितका घर-घरै पुगेर उपचार गर्न उनलाई कसैले अह्राएकाे हैन । नितु आफ्नै मनले अह्राएकाे गर्छिन्।