गाउँमा भेटनरी डाक्टर

म पेशाले भेटनरी डाक्टर हो। सन् २०१८ मा त्रिभुवन विश्वविद्यालयबाट स्नातक पास गरी भेटनरी पेशामा संलग्न छु। अहिले कृषि र वन विश्व विद्यालयमा स्नातकोत्तर अन्तर्गत भेटनरी फार्माकोलोजीमा अध्ययनरत विद्यार्थी पनि हुँ। सरकारले लकडाउन गर्नु भन्दा ठीक दुई दिन अगाडि आफ्नो कार्यक्षत्रबाट घर, प्युठान आएको थिएँ। घरमा सबै जना आउनु भएको छ। अध्ययनको सिलसिलामा २०६६ साल देखि जिल्ला बाहिर रहनु परेको थियो। बेला बेला घर आउने जाने क्रम त चलिरहेको थियो तर यति लामो समय बुवा आमा र परिवारका सबै सदस्यसँग बसेको पहिलो चोटी नै होला।

यसरी घरमा बसिरहँदा एक अर्कामा कुराहरू छलफल भइरहेका छन्। मलाई च साह्रै रमाइलो पनि भइरहेको छ। परिवार कृषिमा आधारित भएको हुनाले कृषि काम पनि भइरहेको छ, जसमा गहुँ बाली, आलु बाली भित्र्याउने काम चलिरहेको छ। मैले पनि थोरै काम गरेर काममा सघाइ रहेको छु। परिवारका सबै सदस्यसँग काम गर्दा छुट्टै रमाइलो हुँदोरहेछ। अहिले म घर आएको बेला, गाउँघरतिर पशुपंक्षी पालनमा समस्या आयो भने किसानहरूले मलाई बोलाउने गर्नुहुन्छ। म कहिले उहाँहरुको गोठ/फार्म मा नै पुगेर पशुपंक्षीको उपचार गर्छु। कोही किसानको घरमा जान सम्भव नभए, वा टाढा भएमा किसान दाजुभाइलाई फोनबाट नै परामर्श दिने गरेको छु।

कोरोनाको कारणले गर्दा आम मानिसहरूमा त्रासको भावना उब्जिएको छ। साथसाथै भ्रामक कुराहरू/अफवाह फैलाइरहेका छन्। जस मध्य एउटा, यस्तो बेला माछा मासु खानु हुँदैन भन्ने गलत कुराहरू आएको देखिन्छ। र गाउँघरमा यस्ता कुराहरू सुन्ने पनि गरेको छु। जसको कारणले गर्दा किसानहरु चिन्तित देखिनुहुन्छ। कुखुरा पालक किसानहरु समयमै कुखुरा र अण्डा बिक्री नहुँदा बढी चिन्तित देख्दछु। र मैले सकेसम्म माछा मासु खानु हुँदैन भन्ने कुरामा विश्वास गर्नेहरुलाई सम्झाउने ,बुझाउने पनि गरेको छु। माछा मासु भनेका प्रोटिनका मुख्य स्रोत हुन्, जसले हाम्रो शरीर मा रोग प्रतिरोधात्मक क्षमता बढाउँछ। माछा मासु खाँदा केही फरक पर्दैन। तर राम्रोसँग पकाएर मात्र खानुपर्छ भनि परामर्श, सल्लाह सुझाब समेत दिने गरेको छु। 

यस्तो अवस्थामा हामी सबैले आ आफ्नो ठाउँबाट सक्दो सहयोग गरौँ ।आफू पनि बचौं अरुलाई पनि बचाऔं , भ्रमलाई होइन यथार्थलाई अगाडि सार्रौं। व्यक्तिगत सरसफाइमा ध्यान दिँदै विश्व स्वास्थ्य संगठनले दिएका निर्देशन पालना गरौं । धन्यबाद ।