परदेशबाट छोरीलाई सम्झना

प्यारी छोरी प्रिन्शा,

तिमीलाई धेरै धेरै सम्झना र माया छ है। हुन त तिमी यस धर्तीमा पाइला टेकेको ३ महिना पूरा हुन लागेको छ। आजसम्म तिमीले बाबा देख्नु पाएकी छैनाैं। तिम्राे बाबाले पनि तिमीलाई देख्न पाएकाे छैन। यस क्षितिज पारीबाट छोरीलाई धेरै सम्झना त छदै नै छ। तिमीलाई भेट्न छिट्टै घर फर्केने तयारी पनि भइरहेको थियो। तर के गर्नु कोराेना भाइरसले गर्दा आज परदेशमै छु। हुन त सानी छोरीलाई  के थाहा संसारमा यतिबेला महामारी छ भनेर । अनि तिमीलाई यति धेरै सम्झिरहने, तिमीलाई यति धेरै माया गर्ने तिम्राे बाबा पनि परदेशमै छ भनेर । तैपनि तिमीलाई भन्न मन लाग्याे- म यहाँ सुरक्षितसँग बसेको छु र यहीबाट तिमीलाई धेरै धेरै माया पठाइरहेछु। यो महामारी सामान्य भए पछि समयले साथ दियो भने मेरी प्यारी छोरी भेट्न अवश्य आउनेछु।

यतिखेर घर पुगेको भए तिमी आफ्नाे बाबाको काखमा हुन्थ्याैं। के गर्ने समयले यस्तै बनायो। आशा गरेकाे छु यो महामारीबाट हामी सबैले छिट्टै मुक्ति पाउनेछाैं अनि हामी बाउ छाेरीकाे भेट हुनेछ,छोरीको त्यो हाँसेका मुस्कान आफ्नै आँखाले देख्न पाउनेछु। यो लकडाउनले गर्दा म एक जना मात्र होइन सबैलाई अन्धकार नै बनाएको छ। तपाईँहरू पनि कति जना आ-आफ्नो नानीबाबुहरुबाट टाढा हुनुहुन्छ हाेला। अनि मैले झै आफ्नो नानी, बाबुहरूलाई सम्झरहनुभएकाे होला। जाे केटाकेटीहरू सँगसँगै हुन पाउनुभएकाे छ उहाँहरु सबैलाई याे फुर्सदको समयमा आ-आफ्नो घर परिवारमा भएका बालबालिकाहरूलाई धेरै माया र साथ दिनुहाेला भन्न चाहन्छु।अनि उनीहरुकाे अझै बढी ख्याल राख्नुहोला।

म भने आफ्नी छोरीबाट धेरै टाढा छु। तिम्राे तस्बिरले धित् मर्दैन । त्यसैले तिमी भेट्ने दिन छिटै आवाेस् भनेर भगवानसँग प्रार्थना गर्दैछु।यो महामारीबाट मुक्त भए पछि छिटै नै छोरी बाबाको काखमा हुनेछन्।

उही तिमीलाई दिनरात सम्झरहने

तिमीलाई धेरै माया गर्ने बाबा ,