कोरोना संक्रमणले नेपालमा लकडाउन भएको महिनादिन बितिसकेछ । सुरुका दिनहरुमा म सोच्थेँ अब कति दिनसम्म लकडाउन हुनेहोला? दिनहरु कस्तो हुने होला? कसरी बित्ने होला? लकडाउन अघि र लकडाउन पछिको काठमाडौँ सहर धेरै नै फरक थियो। कोलाहल र भीडभाडको सहर आज शान्त र सुन्दर छ। लाग्छ सबै मानिसहरु महिना दिन देखि मस्त निन्द्रामा छन्। लकडाउन पछिको काठमाडौँका केही दिनहरु त सहजै बितेका थिए तर आज लामो समय बितिसक्दा निकै अत्यास लाग्दो अनुभूती गर्दैछु।
काठमाडौँ सहर जहाँ सबै जिल्लाका मानिसहरुको बसोबास गर्छन्, अहिले ती जिल्लाका ती मान्छेहरु कहाँ गए? सहरको भीडभाड, मान्छेहरुको घुईंचो, बाटैपिच्छेको ट्राफिक जाम, गाडीहरुको प्वाँ–प्वाँ र पुँउ– पुँउ बिना सबै अहिले खाली–खाली, शून्य र शान्त देखिन्छ, काठमाडौँ ।
जागिरको सिलसिलामा काठमाडौँ आएकी म, लकडाउनकै कारण काठमाडौँको एउटा घरको सानो कोठामा थुनिएकी छु। कहिले कोठा सफा गरेर, कहिले अफिसको काम गरेर त कहिले इन्टरनेटमा फिल्म हेरेर बिते सुरुका दिन। सोच्ने गर्थेँ अझै लकडाउन एक हप्ता थपियोस् ताकि यो कोलाहल र प्रदूषित काठमाडौँले पनि स्वच्छ हावामा आनन्दको श्वास फेर्न पाओस्।
हिजो अस्तिका दिनहरुमा म कोठाको झ्यालबाट देख्ने गर्थेँ, मानिसहरु फुर्सदको श्वास फेर्न पनि पाइरहेका हुन्न थिए।आज यति विशाल सहरमा मैले आफैँलाई एक्लो पाएको छु।तर यत्तिका दिनसम्म पनि अन्योल भएपछि घरपरिवारको न्यास्रो लाग्न थालेको छ।आज काठमाडौँ अत्यास लाग्दो छ।
शब्द, भाषा मिलाएर त्यत्ति राम्रो त लेख्न जान्दिन तर पनि लेख्ने प्रयास गरेकी छु। कृपया पढिदिनु होला।धन्यवाद।
Stay home, Stay safe!
No responses yet